神州茶飲市場競爭白熱化，茶檔爭住上市，原本蜜雪冰城諗住喺旺角開間分店辣一辣市之後乘勢IPO，但結果遲來先上岸，茶百道(02555)搶先成為「茶飲第二股」。而身為「茶飲第一股」嘅奈雪的茶(02150)過去呢一年來都係跌跌不休。
奈雪最新公布今年第一季營運數據，關閉28間直營店，合共淨新增23間直營店，總計1597間直營店，而加盟店就全國總共205間。呢份營運數據，奈雪主力都係公布直營店數目，反而加盟店數目就只係輕輕提吓，反映目前奈雪都仲係依賴緊直營店業務。
奈雪一路都被詬病營運成本太高，早年堅持大店策略，同時用料講究，對於提供「第三空間」非常著緊。但無奈競爭愈來愈大，奈雪都曾經諗過好多方法降低成本，曾經就試過將門市分成「標準店」同「PRO」店，前者係標準又大又闊落嘅cafe式舖頭，後者就係模仿對手喜茶嘅方法，以做外賣單為主，希望可以複製到對手嘅贏法，但最終都係複製唔成功。
後來蜜雪跑出，加盟店又成為咗一個致勝模式，於是奈雪最終都有開放加盟，但身為茶飲業最「高大上」嗰間，加盟入場費都冠絕同行。第一季營運數據入面又講到，今年2月起「優化」咗對加盟商嘅要求，門市面積要求有所下降，單店投資金額下降到58萬人仔。但比起喜茶大約40萬人仔入場費，奈雪仍然貴得多。
奈雪「大店策略」可以話係創立宗旨，但因為成本同競爭問題已經多番將要求降低。其實大店策略本身同茶飲市道就唔太夾，因為茶飲講求快同高流量，但「第三空間」本身就係慢同悠閑嘅象徵，又要賺錢又要「第三空間」其實係好難平衡得到。而偏偏奈雪為咗迎合競爭，就寧願不斷將自己嘅開舖宗旨降低，試問一個不斷「自閹」嘅牌子又點會做得好？最終就變成而家不進則退嘅狀態。閹閹吓唔經唔覺股價已經跌落3蚊以下向兩蚊進發，比起上市價19.8銀已經蒸發差唔多九成，如今真係不失為私有化嘅良機，如果夠現金嘅話，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
全新節目《說說心理話》講述被情緒困擾真實個案，情緒病最終如何走出低谷？► 即睇
